Nunarput tamakkerlugu boligstøttemit, nammineerluni aamma sanaqateqarluni illuliornermut taarsigassarsiat tamaasa INIp aqutarai.
Boligstøttemit illuliaq sunaava?
Boligstøttemit illuliat tassaapput illut, danskit naalagaaffiata aammalu kingusinnerusukkut taamani Namminersornerullutik oqartussaasut aningaasaliissutaannik sananeqartut. Illut amerlanersaat 1950’ikkunni aammalu 1960’ikkunni sananeqarput.
Illunut nutaanut boligstøttemit taarsigassarsiat ukiuni kingullerni tunniunneqarneq ajorput. Taamaattoq suli periarfissaavoq boligstøttemit illuliamik piginnittunngornissaq, taarsigassarsinermi piumasaqaatit allanngortinnagit piginnittut paarlaannerisigut illut pioreersut pigilerlugit. Boligstøttemit illuliaq inuttaqanngitsoq boligstøttemit piumasaqaatit tunngavigalugit piginnittunngornissaq maannakkorpiaq periarfissaqanngilaq, boligstøttemit illuliat inuttaqanngitsut tamarmik tamanut ammasumik annerpaamik neqeroortunut tunineqartarmata.
Boligstøttemit illulianut taarsigassarsinissamik aaqqissuussinerit marluk periarfissaapput. Aaqqissuussinermi siullermi illumik piginnittoq terminit akilernissaannut Namminersorlutik Oqartussanit taperneqartarpoq. Illumik piginnittoq aammattaaq Namminersorlutik Oqartussat eqqarsaatigalugit arlalinnik pisinnaatitaaffeqarlunilu pisussaaffeqarpoq.
Aaqqissuussinerup aappaani illumik piginnittoq termininut tapiiffigineqarneq ajorpoq, taarsiulluguli illumik piginnittutut kiffaanngissuseqarnerulluni. Illut taarsigassarsinermi taamatut aaqissuussiffigineqartut ikittuinnaammata, taamatut aaqqissuussineq tulliuttuni nassuiarneqassanngilaq.
Nammineerluni illuliaq sunaava?
Nammineerluni illualiaq tassaavoq illu, ”Nammineerluni illuliortunut aningaasaleeriaaseq” malillugu akilersorneqartoq. Tassa Namminersorlutik Oqartussat sanaartornermi atortut 95 procentiinut taarsigassarsisitsisissapput, taavalu piginnittup nammineerluni 5 procentit sinneruttut akilissallugit. Tamatuma saniatigut illup sananeqarnissaa, piginnittup akisussaaffigaa. Januaarip 1. 2008-mit aningaasaleeriaaseq taanna atorlugu nammineerluni illuliornissaq periarfissaajunnaarpoq.
Sanaqateqarluni illuliaq sunaava?
Nammineerluni illuliornermik aaqqissugaatoqqamut taarsiullugu januaarip 1. 2008 aallarnerfigalugu aaqqissuussineq nutaaq atuutilerpoq, sanaqateqarluni illuliornermik taaneqartoq, allaanerusumik aningaasalersorneqartoq. Aaqqissuussineq taanna itinerusumik paaserusukkukku, uani nittartakkami immikkut imikkoortortaqarpoq. Atuaruk