Ukioq manna sullarinnerpaaq

Mikkeli inissiani nakkutilliisuuvoq INImilu ukiut marluk affaalu sulilluni. Mikkili sulisuuvoq aalajaatsoq, piffissaq eqqorlugu takkuttarpoq imaluunniit siusinaarluni suliartortarpoq. Sullitatsinnut suliamik ilisimasaqarluarnini atorluartarpaa, soorlu attartortoq saaffiginnikkaangat saaffiginnissut INImiit akissuteqarfigissaa pingaartittarpaa allaat nalliuttuni.

Mikkili suleqatitut tamatigoortuuvoq, sanasutut suliassat assigiinngitsorpassuit sapinngilai. Ajornartorsiutiginngilai sanasutut suliassat suliarissallugit, kallerup inneri aaqqissussallugit aammalu vvs-inut tunngasut suliarissallugit. Aaqqiisuteqarnissamut siunnersuuteqartarpoq, suliassaq eqaatsumik aamma ajornannginnersumik naammassiniassammata. Assersuutigalugu nutaamik attartuisoqalertinnagu suleqatini ikiortigalugu aaqqissuiniartarpoq taamaalilluni attartuisussaq nutaaq nuunnginnermini suliassat ajoqutaasinnaasut suliarisarlugit.

Mikkili suleqatikkuminaartuuvoq, ikiuukkumatooq aamma nukinginartuni ikiuuttarpoq. Taamaalilluni nuannersumik inissisimasarnera suleqataasunut naapertuilluartuuvoq. 
Inissianianik nakkutilliisup Kitsissuarsummiuusup tunuliaqutigivaa tamalaanik sullerissutut atorfeqarsimanini. Mikkilip ilaqutaasa ilaasa maluginiaqqusimavaa INI allagarsiisimasoq inissiamik nakkutilliisutut sulisussaminnik ujaasisoq. Qinnuteqaatini nassiuppaa akunnerillu marluk qaangiummata atorfinippoq.
- Eqqumeeqaaq aamma misigisaq nuannersumik tupaallannarpoq. Uanga isummannik sulinerma ingerlaneranut imatut sunniuteqarpallaarnavianngilaq, taamatummi suliuassaanga, ukiumi sullarinnerpaatut qinigaq nangilluni oqarpoq.
Ukiut marluk affarlu qaangiutereermata 177nik suleqatiminiik ukiup ingerlanerani sullarinnerpaatut qinerneqarpoq.
Mikkel Andreassen pilluaqqungaarparput.