Nunatsinni illoqarfiit eqqiluitsut
Najugaqarfittut immikkoortortaqarfiit INI’llu Saliineq 2010 ingerlappaat.
Arfininngornermi saliinermi illoqarfiit arfinilinnik ikinnerunngitsut saliiffiupput, ullullu naanerani qaammat ataaseq ineqarnermut akiliinnginnissamik eqquisut makinneqarput. Taamatuttaaq sapaammi kommuni suleqatigalugu Uummannap illoqarfiani saliisoqarpoq.
Illoqarfinni arfinilinni taakkunani Najugaqartut siulersuisuinik suleqateqarluarneq, aammalu Uummannami Qaasuitsup kommuniata immikkoortortaqarfianik suleqateqarluarneq, INIp qujassutigaa.
Uummannaq
Saliinermi peqataasut ikikkaluartut ulloq ingerlalluarpoq, tassani ilaatigut anartarfiup sipannia eqqugassaalluni.
Ineqarnermut akiliinnginissamik eqquisoq
Uummannami eqquisoq tassaavoq Elisabeth Skade najugaqarfittut immikkoortortaqarfimmi 361-imi najugaqartoq.
Qasigiannguit
Qasigiannguani najugaqartut siulersuisuini siulittaasup Najannguaq Lundbladip nalunaarutigaa, peqataasut naatsorsuutigisamit amerlatigingitsut. Kisianni nalunaarutigalugu peqqutaasinnaasoq, amerlanerit maajip qaammataani upernarnerani saleereersimanerat.
Peqataasut tasaanerupput attartortut utoqqalereersut, 70’ileereersut, tassani peqataasuni utoqqaanersaalluni 79’inik ukiulik. Meeeqqat marluk saliinermi peqataagaluartut, peqataasut arlallit uggornartippaat, ukiumoortumik upernarnerani saliisarnermi meeqqat peqataasarunnaarnerat, tamanna akisussaassuseqarnermut aqqutissuisooqataasarmat.
Ineqarnermut akiliinnginissamik eqquisoq
Immikkoortortaqarfik 311-mi ineqarnermut akiliinnginnissamik eqquisoq tassaavoq Petra Lyberth.
Petra Lyberth uialu INI’p pilluaqqungaarpai.
Saliinerup saniatigut imm. 311-p siunissami taaguutissaa pillugu unammisitsisoqarpoq. Qajugaasoq tassaalerpoq Gaba Rosbach, siunissamilu imm. 311 taaguuteqalissaaq: Qasigiannguani Najungaqartut Peqatigiiffiat Inussunnguaaraq (QNPI).
Sisimiut
Aamma tamaani kommunip aammalu namminersorlutik oqartussat inissiaataanni saliineq iluatsilluaqaaq.
268-imi najugaqartut siulersusuini siulittaasoq Jonna Qvist nalunaarpoq, immikkoortortaqarfik 268-imi saliineq immikkut ingerlalluartoq, Tuapanngarmiunik paatsungaanermi attartortut makitassanik ikinnerusunik tunineqarsimanerat eqqaassanngikkaanni.
Najugaqarfittut immikkoortortaqarfik 268 najugaqarfiusvoq siammasissoq, taamaattumillu najugaqarfiit tamakkerlugit inuttalersornissaat siulersuisunut ajornakusoorpoq. Taamaattumik INI inittuliilluni ikiuuivoq.
Siulersuisut Kussangasoq, Adammip aqq. Ujaqqerivik, Narsannguaq aamma Salliaq inuttalerpai. Taakkunanilu saliineq ingerlalluarpoq, najugaqarfinni allani, soorlu Tuapannguani, Qeeqini aamma Umiivitsiami ataatsimoorneq amigaataasoq, taakkunani siulersuisut, siulersuisuni eqeersimaartut ikippallaarneri peqqutigalugit, inuttalersinnaannginnamikkit.
Ineqarnermut akiliinnginnissap saniatigut imm. 268-ermiut najugaqartut arlalissuarnik eqqugassaqartitsipput. Ilaatigut Pisiffimmut gavekortit 7 x 200 kr., Nintendo Wii, nerisassanik aserorterut allallu.
Niviarsiani utoqqaat najugaqartut sukumiisumik saleeriikatassimagamik, tamanna utoqqaat uggornarteqaat. Taamaattoq najuuttut ikikkaluarlutik puussiarsuarnik arlalinnik immiipput. Nal. akunneri marlussuit kingorna kalaalimineertuuttoqarpoq.
Ineqarnermut akiliinngittussatut eqquisut
Immikkoortortaqarfik 267-imi Arnannguaq Isaksenip ineqarnermut akiliinnginnissaq eqqorpaa, imm. 268-imi Lydia Lerch eqquisoq. Inip eqquisut pilluaqquai.
Namminersorlutik Oqartussat najugaqarfittut immikkoortortaqarfiutaanni 267-imi attartortut ukiut tamaasa saliisarneq sungiusimavaat ilitsersorneqartariaqaratillu. Najugaqartut siulersuisui eqeersimaartunik najugaqarfinni klubbeaqarput, namminneerlutik najugaqarfimminnik isumaginnittunik.
- Taakku uagutsinnut pingaartorujussuupput. Annerusumik ilitsersortariaqanngillat, taamaattumik najugaqarfiit namminersortuunerupput, 267-imi siulittaasoq, Frederik Labansen, ilisimatitsivoq.
Aqqartarfimmi najugaqartut ulloq tamaat tamulugassaqarput imeruersaatissaqarlutillu. Paamaap Kuuani ullup-qeqqanut neripput imeruersarlutillu. Inersimasut aataavaqqamik neqitugassaqarput, meeqqallu pølsitorlutik. Deichmannip aqqutaani saliineq aamma iluatsilluarpoq, najugaqarfik attartortunik saliisunik aalaaluttuinnaalluni. Nuunnguami peqataasut ikinnerulaarput, najuuttulli tamaviaarluaqaat.
Aammattaaq 267-imi Pisiffimmut gavekortit 7 á 200 kr., ineqarnermut akiliinnginissap saniatigut eqqugassaapput.
Nuuk
Ineqarnermut akiliinnginnissamik eqqugassaqartitsineq siorna Nuummi aallarnerneqarpoq. Iluatsilluaqimmat ukioq manna illoqarfinnut allanut siammarsarneqarpoq.
Ukioq manna aamma iluatsilluaqaaq. Narsarsuarmi attartortut 103 taavalu Qapiarfiusaami 53 peqataapput.
Ineqarnermut akiliinnginnissamik eqquisut
Nuummi Namminersorlutik Oqartussat najugaqarfittut immikkoortortaqarfiutaat pingasuupput. Ineqarnermut Naalakkersuisoq Jens B. Frederiksen eqquisunik makitsisuuvoq:
Imm. 161 : Kathrine Knudsen
Imm. 163 : Johanne Mathæussen
Imm. 165 : Augustine Fleischer
Paamiut
Paamiuni naajugaqartut siulersuisui nutaarluinnaapput, taamaattumillu siulersuisut annerusumik aaqqissuussissallutik periarfissaqarsimanngillat, kisanni imeruersaatissaqartitsillutik. Najugaqartut siulersuisui nutaajugaluartut INI ikiortigitillugu ulloq iluatsilluarpoq.
Paamiuni INIp sulisuata nalunaarutigaa, peqataasut 50 missaaniittut taavalu puussiarsuit nassarneqartut 250 tamakkerlugit nal. ataatsip qaangilaarnerani tamarmik ulikkaarneqarlutik.
Ineqarnermut akiliinnginnissamik eqquisoq
Paamiuni Namminersorlutik Oqartussat najugaqarfittut immikkoortortaqarfiutaanni 140-mi ineqarnermut akiliinnginnissamik eqquisoq tassaavoq Sofus Lorentzen. Sofus INI-mit pilluaqquarput. Makitsineq Ineqarnermut Naalakkersuisuusimasup Kim Kielsenip ingerlappaa.
Qaqortoq
Ineqarnermut akiliinnginnissamik eqquisoq
Qaqortumi Namminersorlutik Oqartussat najugaqarfittut immikkoortortaqarfiutaanni 112-mi ineqarnermut akiliinnginnissamik eqquisoq tassaavoq Jakob Johansen. Jakob INI-mit pilluaqquarput.
Nanortalik
Ineqarnermut akiliinnginnissamik eqquisoq
Nanorttalimmi najugaqarfittut immikkoortortaqarfimmi 102-mi ineqarnermut akiliinnginnissamik eqquisoq tassaavoq Ado Johansen. Ado pilluaqquarput.